നടന്‍ ഹരീഷ് പേങ്ങന്‍ അന്തരിച്ചു
കൊച്ചി: നടന്‍ ഹരീഷ് പേങ്ങന്‍ അന്തരിച്ചു. കൊച്ചിയിലെ സ്വകാര്യ ആശുപത്രിയില്‍ വെച്ചായിരുന്നു അന്ത്യം.
48 വയസ്സായിരുന്നു. കരള്‍ രോഗം ബാധിച്ചതിനെത്തുടര്‍ന്ന് ഗുരുതരാവസ്ഥയില്‍ ചികിത്സയിലായിരുന്നു.
വയറു വേദനയുമായി ആശുപത്രിയില്‍ പ്രവേശിപ്പിച്ചപ്പോഴാണ് കരള്‍ സംബന്ധമായ അസുഖമാണെന്നു തിരിച്ചറിഞ്ഞത്. കരള്‍ ദാനം ചെയ്യാൻ ഹരീഷിന്റെ സഹോദരി തയാറായി.
എന്നാല്‍ ശസ്ത്രക്രിയക്ക് ഭീമമായ തുക ആവശ്യമായി വന്നിരുന്നു. തുടര്‍ന്ന് ചികിത്സയ്ക്കായി ഹരീഷിന്റെ സുഹൃത്തുക്കള്‍ സോഷ്യല്‍ മീഡിയയിലൂടെ സഹായം അഭ്യര്‍ത്ഥിച്ചിരുന്നു.
മഹേഷിന്റെ പ്രതികാരം, ഷഫീക്കിന്റെ സന്തോഷം, ഹണീ ബി 2.5, വെള്ളരിപ്പട്ടണം, ജാനേ മൻ, ജയ ജയ ജയ ഹേ, പ്രിയൻ ഓട്ടത്തിലാണ്, ജോ&ജോ, മിന്നല്‍ മുരളി തുടങ്ങി നിരവധി സിനിമകളില്‍ ഹരീഷ് പേങ്ങൻ അഭിനയിച്ചിട്ടുണ്ട്.